ဒါဟာ စုံတွဲတွေအတော်များများ အကာအကွယ်မဲ့ လိင်ဆက်ဆံတဲ့အခါမှာ ပူပန်ရတဲ့ အဓိက ပြဿနာတစ်ခုပါ။ “ဆရာ ကျွန်တော်ကောင်မလေးနဲ့ဆက်ဆံတာဆေးမတိုက်မိဘူး ဒါပေမယ့်အပြင်မှာပြီးတာဆရာ။ အဲ့ဒါကိုယ်ဝန်ရနိုင်လားမသိဘူး။” “ဆရာရှင့် သမီးကောင်လေးနဲ့ ဟိုရက်က မမျှော်လင့်ဘဲ အတူနေမိတယ်၊ ဆေးသောက်ဖို့လည်းမေ့သွားတယ်။ ဒါပေမယ့် သူကမပြီးလိုက်ဘူး။ အဲ့ဒါကိုယ်ဝန်ရနိုင်လား။”
ဒီမေးခွန်းတွေကို သမီးရည်းစား အတော်များများကမေးကြပါတယ်။ ခုခေတ်တွင် လူတိုင်းကိုယ်စီ ဖုန်းကိုင်နိုင်လာကာ အင်တာနက်ကိုလည်း လူတိုင်းနီးပါသုံးလာနိုင်ကြသည်။ လူငယ်တချို့တစ်ဝက်သည် အင်တာနက်ကို လွဲမှားစွာသုံးရာကနေ ငယ်ငယ်ရွယ်ရွယ်နဲ့ ရည်းစားထား ဖိုမသဘာဝကိုသေချာ နားမလည်ပဲ နည်းနည်းပါးပါး ကြားဖူးသိဖူးတာကို အဟုတ်ထင်ကာ လက်တည့်စမ်း ကျူးကျူးလွန်လွန်တွေဖြစ် နောက်ဆုံး မဖုံးနိုင် မဖိနိုင်တွေဖြစ်လာတော့ မလိုလားအပ်တာတွေ ကြုံလာရတယ်။ ဒါကြောင့်ကိုယ်က တစ်ခုခုကိုသိတယ်ဆိုရင် မရေမရာသိတာမျိူးမဟုတ်ဘဲ သေချာဂဃဏန သိဖို့လိုပါတယ်။ ဒါကြောင့်မိန်းမကိုယ်ပြင်ပတွင် သုက်လွှတ်ခြင်းနဲ့ ပတ်သက်ပြီး ဆောင်းပါးရေးလိုက်ရပါတယ်။
သုက်အပြင်ထုတ်ခြင်းဟာ ကိုယ်ဝန်မရအောင်တားနည်းများအနက် ထိရောက်မှုအနည်းဆုံး (ဆိုလိုတာကမအောင်မြင်နိုင်ခြေအများဆုံး) နည်းလမ်းပါ။ တားဆေးသောက်တာတို့ ကွန်ဒုံးသုံးတာတို့နဲ့ယှဉ်ရင် ကိုယ်ဝန်မရဖို့ ၁၈ရာခိုင်နှုန်းပဲ စွမ်းဆောင်ပေးနိုင်ပါတယ်။ ဘာကြောင့်လဲဆိုတော့ စိတ်ဆန္ဒအမြင့်ဆုံးရောက်ပြီးတဲ့အချိန်မှာထွက်လာတဲ့ သုက်ရည်မှာသာ သုတ်ကောင်ပါတာမဟုတ်ဘဲ အဲ့မတိုင်ခင်ထွက်တဲ့အရည်ကြည်ထဲမှာလည်း သုက်ကောင်ပါလို့ပါ။
တချို့ လူငယ်များသည် အကာအကွယ်မဲ့ လိင်ဆက်ဆံပြီး သုက်လွှတ်ကာနီးတွင် မအင်္ဂါတွင်းမှ ထုတ်ကာ သုက်လွှတ်လေ့ ရှိကြပါသည်။ ဤသို့ ပြုလုပ်ခြင်းဖြင့် ကလေး မရနိုင်ဟု ကြားဖူးနားဝဖြင့် ယူဆထားကြသည်။ ဒါဟာအယူအဆ အမှားတစ်ခုပါ။ အမျိုးသားတိုင်းဟာ သုက်ရည်မထုတ်ခင်မှာ ကနဦး အရည်ကြည်လေးတွေ ထုတ်လေ့ထုတ်ထ ရှိတယ်။ ဒီအရည်ကြည်လေးတွေမှာဆို ၄၀ရာခိုင်နှုန်းလောက် သုက်ပိုးလေးတွေ ပါတာတွေ့ရှိရပါတယ်။ ဒါကြောင့် အချိန်မီ အပြင်ကို ထုတ်သော်လည်းပဲ ကိုယ်ဝန်ရတာပါ။
ဒါ့အပြင် မိန်းမကိုယ်ပြင်ပမှာသုက်လွှတ်ဖို့ဆိုတာ ပြောသလောက်လွယ်တဲ့ ကိစ္စမဟုတ်ပါဘူး။ စိတ်ဆန္ဒအထွတ်အထိပ်ရောက်နေချိန်မှာ ချိန်သားကိုက် ဆွဲထုတ်နိုင်ဖို့အတွက်က လိင်ပိုင်းဆိုင်ရာ အတွေ့အကြုံတွေ အများကြီးရှိဖို့ရယ်၊ ကြွက်သားတွေ အာရုံကြောတွေမှာ ဘာရောဂါမှမရှိဘဲ ကောင်းနေဖို့ရယ် စတဲ့အချက်တွေလိုပါတယ်။ အဲ့ဒီအချက်တွေနဲ့ ပြည့်စုံနေတဲ့ အမျိူးသားတွေမှာလည်း တစ်ခါတလေမှာ တကယ်ခံစားမှုကောင်းနေချိန်တွင် မိန်းမကိုယ်အပြင်မှ သုက်လွှတ်ဖို့ မစွမ်းနိုင်တော့တာမျိုးတွေလည်း ရှိတတ်ပါသေးတယ်။
ဒါ့ပြင်မိန်းမကိုယ် ပြင်ပသုက်လွှတ်ခြင်းဟာ လိင်ကနေတဆင့် ကူးစက်တတ်တဲ့ အေအိုင်ဒီအက်စ်တို့ ဘီပိုး စီပိုး စတာတွေကိုလည်း အကာအကွယ်မပေးနိုင်ပါဘူး။
နောက်ထပ်အယူအဆမှားတစ်ခုကို ကြုံတုန်းထပ်ပြောချင်ပါတယ်။ တချို့စုံတွဲတွေက အကာအကွယ်မဲ့ လိင်ဆက်ဆံ ပြီးတဲ့အခါမှာ ပြီးလျှင်ပြီးချင်း မအင်္ဂါကို ရေသေချာဆေးလိုက်ရင် ကိုယ်ဝန်မရနိုင်ဟု ထင်နေကြပါတယ်။ ဒါဟာမဟုတ်ပါဘူး။ အဘယ်ကြောင့်ဆိုသော် အမျိုးသားမှ သုက်လွှတ်ပြီး စက္ကန့် (၉၀) အတွင်း၌ သုတ်ကောင်သည် သားအိမ်ခေါင်းကိုဖြတ်ကာ သားအိမ်အတွင်းသို့ ဝင်ရောက်ပြီး ဖြစ်သည့်အတွက်ကြောင့်ပါ။ သုတေသနတစ်ခုအရ သုတ်ကောင်တွေရဲ့ရွေ့လျားနှုန်းဟာ ၁ စက္ကန့်ကို ၅ မီလီမီတာ (ဝ.၂ လက်မ) ရှိပါတယ်။ ဒါဟာ တော်တော်လေးကို မြန်ပါတယ်။
တကယ်လို့ အရွယ်အစားနဲ့ အမြန်နှုန်း အချိုးကျ ပြောဆို ဝေလငါးတစ်ကောင်သာ Sperm တစ်ကောင်လောက် မြန်မြန်ကူးလိုက်ရင် တစ်နာရီကို မိုင် တစ်သောင်းခွဲနှုန်း ဖြစ်နိုင်ပါတယ်။ နောက်ပြီးသုက်ကောင်ရဲ့သက်တမ်းဟာ မအဂါၤထဲမှာဆိုရင် ၃ရက်လောက်ထိ အသက်ရှင်နိုင်ပါတယ်။ အဆုံးသတ်အနေနဲ့ပြောရရင်တော့ လက်မထပ်ခင် ခြေလွန်လက်လွန်ကိစ္စမျိူးတွေ ဖြစ်တာကိုရှောင်ပါ။ မရှောင်နိုင်လျှင် ကွန်ဒုံးသုံးပါ။ ကွန်ဒုံးသုံးတာဟာ စနစ်တကျသုံးပါက ကိုယ်ဝန်မရဖို့ ကို ၉၈ ရာခိုင်နှုန်း ကာကွယ်ပေးတဲ့အပြင် လိင်ကတဆင့်ကူးဆက်ရောဂါတွေကိုလည်းကာကွယ်ပေးနိုင်ပါတယ်။
Author : Dr. 528
မူရင်းရေးသားသူများနှင့် ပို့စ်တင်သူများအား လေးစားစွာ Credit ပေးပါသည်။
မျိုးဆက်ပွားကျန်းမာရေး ပို့စ်များကို Application မှာစုစည်းထားပေးလို့ အလွယ်တကူဖတ်ရှုနိုင်ပြီ။ အောက်ပါ link မှာ Download ဆွဲပြီး Install ပြုလုပ်နိုင်ပါသည်။
http://bit.ly/2kyts4o
Comments
Post a Comment