လွမ်းမောဖွယ်ကောင်းသော ဥသြော်တွန်သံ သည် ညနေ ဆည်းဆာ၏ အလှကို ဖြည့်စွက်လျှက်ရှိသည်။ နွေဦး ၏ အလှနှင့် အရာအားလုံးသည် လွမ်းမောဖွယ်ကောင်းနေသည်။ ဒေါက်တာ လှနုဝေ တစ်ယောက် ညနေခင်း အလှကို ခံစားရင်း မိဘများ ရှိရာ ရန်ကုန်မြို့သို့ တမ်းတနေမိသည်။ အစိုးရ ဝန်ထမ်းတစ်ယောက် အနေနှင့် တာဝန်ကျရာ အရပ်ဒေသသို့ တာဝန်ထမ်းဆောင်ရင်း ဘွဲ့လွန်စာမေးပွဲ ဖြေရန် ကြိုးစားနေမိသည်။
ညနေ အားလပ်ချိန်များတွင် ကိုယ်ပိုင်ဆေးခန်းလေးဖွင့်ကာ အပိုဝင်ငွေလေးရှာနေမိသည်။
” ၁ဝ တန်းစာမေးပွဲ နီးနေပြီ ဆရာမရေ။ ကလေးက ဓမ္မတာ မလာတာ ၂ လရှိပြီ ။ ဒါကြောင့် ပေါ်ဆေးလေး လာထိုးတာပါ။ ”
” စာမေးပွဲ ဖြေဖို့ရက်ပိုင်းလောက်ပဲ လိုတော့တာပဲ။ ကလေးက စာမေးပွဲ အတွက် စိတ်ဖိစီးနေတာကြောင့် ဓမ္မတာ မလာတာပါ အမ။ စာမေးပွဲ နီးရင် ဒီလိုပဲ ဖြစ်တတ်ပါတယ်။ ” လှနုဝေ တစ်ယောက် ကလေး အမေကို ရှင်းပြလိုက်သည်။
” အရင်က တစ်ခါမှ ဒီလိုမျိုး မလာတာမျိုး မဖြစ်ဖူးပါဘူး ဆရာမရယ်။ စာမေးပွဲတွေက အရင်ကလည်း ဖြေနေတာပဲ။ သူ့မှာ ဘာစိတ်ဖိစီးစရာရှိလို့လဲ ”
” သြော် အမရေ ကျောင်းသားဆိုတာမျိုးက စာမေးပွဲကို ကြောက်ကြတာ။ လန့်ကြတာ။ စိတ်ပူကြတာမျိုး ရှိတာပေါ့။ ဘယ်လောက် စာတွေ ရပါတယ် ပြောပြော အနည်း အများသာ ကွာမယ်။ စိတ်ဖိစီးတာမျိုးရှိတာပေါ။ စာမေးပွဲလည်း နောက်အပတ်ထဲ ဖြေရမှာဆိုတော့ ကလေးက စိတ်ဖိစီးနေလို့ ဓမ္မတာ မလာသေးတာပါ။ ”
” ဟုတ်လို့လား။ ကျွန်မတော့ တစ်ခါမှ မဖြစ်ဖူးပါဘူး။ ကျွန်မလည်း ငယ်ငယ်က စာမေးပွဲတွေ ဖြေဖူးပါတယ်။”
” လူတိုင်းဖြစ်တယ်လို့တော့လည်း ဘယ်ဟုတ်မလဲ။ စိတ်ပူတတ်တဲ့သူတွေမှာ ဖြစ်တတ်တာပေါ့။ အခု ကလေးက စိတ်ပူတတ်တဲ့သူမျိုးထင်တယ်။ ကျွန် မ အားဆေးပေးလိုက်ပါမယ်။ အားဆေး သေချာတိုက်ပါ။ အာဟာရရှိအောင် ကျွေးပါ။ အိပ်ရေးဝဝ အိပ်ပါစေ။ ” အမေ ဖြစ်သူကို စိတ်ရှည်ရှည် ရှင်းပြပေးလိုက်သည်။
” ကလေးက နောက်အပတ်ထဲ စာမေးပွဲဖြေတော့မှာပါပဲ။ စာမေးပွဲ ပြီးလို့ စိတ်ဖိစီးတာ လျော့သွားရင် ဓမ္မတာ ပြန်လာပါလိမ့်မယ်။ ကျွန်မ ဆေးကျောင်းတက်တုန်းက ဆိုရင်လည်း ဒီလိုမျိုးပဲ။ ခဏခဏ ဓမ္မတာ ပျောက်သွားတတ်တယ်။ စာမေးပွဲနီးရင် ဖြစ်နေကျပဲ။ စိတ်ပူတာကိုး။ စာမေးပွဲပြီးမှ ပဲ ဓမ္မတာ လာတာ။ ဒါကြေင့် အမ သမီးကိုလည်း စိတ်မပူပါနဲ့။ ”
” ဟုတ်ကဲ့ပါ ဒေါက်တာရယ် ”
သား အမိနှစ်ယောက် ဆေးခန်းအတွင်းမှ ထွက်သွားကြသည်။ အားဆေး များပေးကာ ပြန်လွှတ်လိုက်သည်။ မိမိတုန်းကလည်း ဒီလိုမျိုးစာမေးပွဲရှိလျှင် ဓမ္မတာ နောက်ကျတတ်သည်။ အမျိုးသမီးများ၏ ရာသီစက်ဝန်းသည် အမျိုးသမီးများ၏ စိတ်အခြေအနေပေါ်တွင် အများကြီးမူတည်နေသည်။ စာမေးပွဲနီးလျှင် ဓမ္မတာ နောက်ကျတတ်သည်မှာ အမျိုးသမီး တော်တော် များများတွင် ဖြစ်တတ်သည်။
မေ့မေ့ပျောက်ပျောက်ဖြစ်နေတာကြာပြီ။ ၁ဝ တန်းစာမေးပွဲ ဖြေပြီး ၁ လလောက် အကြာတွင် သားအမိနှစ်ယောက် လှနုဝေ ဆေးခန်းသို့ ပြန်ရောက်လာကြသည်။
“ဒေါက်တာရယ် ကလေးက စာမေးပွဲ ဖြေပြီးပြီ။ စိတ်ဖိစီးမှုမရှိတော့ရင် ဆရာမ က ဓမ္မတာ ပြန်လာမယ်ဆိုလို့စောင့်နေတာ။ ပြန်မလာပါဘူး ဒေါက်တာရယ်။ ပြီးတော့ ဗိုက်လေးလည်းပူလာတယ်။ ဗိုက်ထဲမှာ သွေးတွေ စုနေပြီထင်တယ်။ ဆရာမရယ်။ လုပ်ပါဦး ”
ကလေး အမေစကားကြေင့် ဒေါက်တာ လှနုဝေ တစ်ယောက် ခေါင်းကြီးသွားသည်။ ရာသီသွေး မဆင်းသည်နှင့် ဗိုက်ပူလာသည်ဆိုသည်မှာ ဆက်စပ် တွေးတောလို့ မရနိုင်။ ကလေးမလေးကို ကုတင်ပေါ် တက်ခိုင်းပြီး စမ်းကြည့်လိုက်သည်။
ဆီးခုံ အပေါ်နားတွင် ဖောင်းနေသည်က အမှန်ပင်။ ရာသီသွေးမလာသည်ကလည်း ၃ လကျော် နေပြီဆိုတော့ ဒေါက်တာလှနုကြည်တစ်ယောက် စဉ်းစားရပြီ။ ဓမ္မတာ မလာသည်မှာ ရိုးမှ ရိုးရဲ့လားလို့ လည်း စိုးရိမ်မိသည်။
ဆီးစစ်ကြည့်ချင်သည်။
” ဆီးစစ်ကြည့်ချင်တယ်။ ” အမေ ကို လှည့်ပြောလိုက်သည်။
“ဒီခွက်လေးထဲ ဆီးပေါက်ပေးပါနော်။ သမီးလေး ”
ကလေးကို ဆီးခွက်လေးပေးလိုက်သည်။
” ဆရာမ ကလေးကို ဘာလို့ ဆီးစစ်ချင်ရတာလဲ ဒေါက်တာ ဘာထင်လို့လဲ ” အမေက လှနုဝေ နားကပ်ကာ ပြောသည်။ ဆေးခန်း အပြင် တွင် တစ်ခြား လူနာတွေလည်း ရှိနေသည်မို့ ကျယ်ကျယ်လည်း မပြောရဲ။
“ဆရာဝန်ဆိုတော့ ဖြစ်နိုင်တာတွေ အားလုံးကို စဉ်းစားရတာပါ။ ”
“ကလေးက ၁၆ နှစ်တောင် မပြည့်သေးတဲ့ နို့နံ့ မစင်သေးတဲ့ ကလေးပါ။ ဒေါက်တာ ကျွန်မ သမီးကို ယုံထင်ကြောင်ထင် မထင်ပါနဲ့။ သွေးပေါ်အောင် ဆေးသာ ထိုးပေးလိုက်ပါ ”
” ဘာဖြစ်လို့ ဓမ္မတာ မလာတာလဲ ဆိုတာ သိဖို့လိုသေးတယ် အမ။ ဗိုက်ပူလာတယ်ဆိုတာ အမတို့လည်း သိနေတာပဲ။ ”
” ဆရာ မ ဒီအကြောင်းတွေ ကိုဘယ်သူ့ကိုမှ ပြန်မပြောနဲ့နော်”
“ဟုတ်ကဲ့ပါ အမရဲ့။ ဒါဆိုရင်လည်း ဗိုက်ပေါ်က အလုံးတလုံးတွေ့နေရတော့ အာထရာဆောင်းတော့ ရိုက်ကြည့်လိုက်ပါ။ ကျွန်မကို ပြီးရင် အာထရာဆောင်း အဖြေနဲ့ ပြန်လာပြပါ။ ဒါမှ ကလေး ဘာဖြစ်တယ်ဆိုတာ သိရမှာပေါ့ ”
သား အမိနှစ်ယောက် ဆေးခန်းထဲမှ ပြန်ထွက်သွားကြသည်။ အမေ ကသဘော မတူသည်နှင့် ဆီး မစစ်လိုက်ရပါ။
နောက်နေ့ ကလေး မပါပဲ အမေ တစ်ယောက်ထဲသာ အဖြေစာရွက်လေးနှင့် အတူ ဆေးခန်းထဲသို့ ဝင်လာသည်။ အဖြေ စာရွက် ကို ဒေါက်တာ လှနုဝေအား ပေးလိုက်သည်။ ဒေါက်တာ လှနုဝေ အာထရာဆောင်း အဖြေစာရွက်ကို ကိုင်ရင်း ဆုတောင်းနေမိသည်။ ဆုတောင်းများ မပြည့်ဝပါ။
ကလေးတွင် ကိုယ်ဝန် ၃ လကျော် ရှိနေပြီဟု ရေးထားသည်။ ကလေး အမေကား ဒေါက်တာ လှနုဝေ မျက်နှာကို မျက်တောင် မခတ်ပဲ ကြည့်နေမိသည်။ ဘာပြောရမည်မှန်းမသိ။
ကိုယ့်မျက်စိရှေ့တွင် ရှိနေသော ကောင်မလေးသည် အသက် ၁၆ နှစ်တောင် မပြည့်သေးသော ကလေး တစ်ယောက်။ သူ့ဗိုက်ထဲတွင် ၃ လဆိုသော ကိုယ်ဝန်ကို ဆောင်ထားသည်။ ကလေး အမေကို မည့်သို့ ရှင်းပြမည်နည်း။ မည်သူ့ကို အပြစ်တင်ရမည်နည်း။ ခေတ်ကိုပဲ အပြစ်တင်ရမည်လား။ မိဘ များကိုပဲ အပြစ်တင်ရမည်လား။ ကျန်းမာရေး ဗဟုသုတ မျှဝေမှုနည်းသော မိမိတို့ ဆရာဝန်များကိုသာ အပြစ်တင်ရမည်လား။ ကလေးများကို မျိုးဆက်ပွားကျန်းမာရေး အသိပညာ များပေးဖို့ အားနည်းမိသည်ကိုပဲ အပြစ်တင်ရမည်လား စဉ်းစားနေမိသည်။
” ဘာရောဂါလို့ပြောထားလဲ ဆရာမ ”
လှနုဝေ တစ်ယောက် မျက်မှန်ကို ချွတ်လိုက်သည်။ ထိုင်နေရာမှ ရှေ့သို့ကုန်းကာ ကလေးအမေနှင့် နီးကပ်အောင် တိုးလိုက်သည်။
“ကလေးမှာ ကိုယ်ဝန် ၃ လရှိပြီလို့ ရေးထားတယ် အမ ” လှနုဝေ တစ်ယောက် တိုးတိုးလေးသာ ပြောလိုက်သည်။ သို့သော် လှနုဝေ ပြောစကားကား ကျယ်သွားသည် ထင်ရသည်။ ကလေး အမေ ခမျာ လန့်ဖျံ့သွားသည်။ ခဏအတွင်း နဖူးမှာ ဇောချွေး များ စို့လာသည်။
” သေချာလို့လား ဆရာမရယ် ”
” သေချာပါတယ် အမရယ်။ အာထရာဆောင်းမှာ ရေးထားတာပဲ ”
တစ်ခဏချင်းပင် ကလေး အမေ သည် အိုမင်းရင့်ရော်သွားသည်ဟု ထင်ရသည်။ ဘာစကားမှ မပြောပဲ အကြာကြီးထိုင်နေသည်။
“အမ ဒီကိစ္စ တွေကို မရိပ်မိဘူးလား ” လှနုဝေမှ တိတ်ဆိတ်နေသည်ကို စတင်၍ ဖြေခွင်းလိုက်သည်။
” ကျွန်မလည်း သူ့ကို ဂရုစိုက်နေတာပါပဲ။ ဘယ်အချိန်ကများ ဖြစ်သွားလဲ မသိဘူး။ ကလေး အဖေ သိရင်တော့ မိုးမီးလောင်တော့မှာပဲ ”
” ကလေးကို ချော့မော့ မေးကြည့်ပေါ့ အမရယ် ” လှနုဝေတစ်ယောက် အားပေးစကားပြောလိုက်သည်။ ကိုယ်လည်း ဒီထက် ပိုပြီးတော့ မပြောတတ်ပါ။
” အိမ်ပြန်ရောက်မှ ပဲ ချော့မော့ မေးကြည့်ရမှာပဲ။ သူလိုပဲ အသက်မပြည့်သေးတဲ့သူ ဆိုရင်တော့ မလွယ်ဘူး ။ ကျွန်မတော့ သေသာ သေလိုက်ချင်တော့တာပဲ ” အမေဖြစ်သူကား ငြီးငြီးငြူငြူနှင့် မျက်နှာပျက်နေသည်။
“ဒီလိုလည်းဘယ်ဟုတ်မလဲ ကလေးကို သေချာ မေးကြည့်ပါဦး။ ကလေး အဖေ ဘယ်သူဖြစ်မလဲဆိုတာ သိမှ ကျန်တာတွေ စဉ်းစားကြတာပေါ့ အမရယ် ”
” ဟုတ်ကဲ့ပါ ဆရာမရယ်။ ကျွန်မ ပြန်လိုက်ဦးမယ်နော် ” ကလေး အမေ ကား ပြာပြာသလဲနှင့် ထပြန်သွားသည်။ လှနုဝေတစ်ယောက် ရင်မောစွာ ကျန်ခဲ့သည်။
” အကျိုးအကြောင်းလေးလည်း ပြန်လာပြောဦးနော် ” လှမ်းမှာလိုက်သည်။
နောက်တစ်နေ့ သားအမိနှစ်ယောက် ပြန်လာဦးမလားဟု လှနုဝေ တစ်ယောက် မျှော်နေမိသည်။ တစ်ပတ်လောက်ကြာတော့ ဆေးခန်းပိတ်ခါနီး ကလေး အမေ နောက်တစ်ခါ ထပ်ရောက်လာသည်။
” ကလေး အဖေ တော့ သိခဲ့ပြီ ဆရာမရေ။ သူတို့ အတန်းထဲ က ကောင်လေး တစ်ယောက်ပဲ ။ သူ့လိုပဲ ၁ဝ တန်းကျောင်းသားပဲ ” အသံတိုးတိုးလေးနှင့် ပြောနေ၍ လှနုဝေ တစ်ယောက် မနည်းနားထောင်လိုက်ရသည်။
” ဟုတ်လား ” လှနုဝေတစ်ယောက် ကလေးများအား အံသြမိသည်။ အသက်ငယ်ငယ်ရွယ်ရွယ်နှင့် အတက်ကောင်းများ တက်နေကြပြီ။
” ကျွန်မကတော့ သူတို့နှစ်ယောက်ကို ဘယ်လိုမှ မပေးစားနိုင်ဘူး။ ဆရာမ ကျွန်မကို တစ်ခုတော့ ကူညီပါ ”
” အဲဒီတော့ အမက ဘယ်လိုလုပ်ချင်လို့လဲ ” လှနုဝေတစ်ယေက် လန့်ဖြန့်သွားသည်။
” ကလေး ဖျက်ချဖို့တော့ မတောင်းဆိုနဲ့နော်။ ကျွန်မ ဆရာဝန်တစ်ယောက် အနေနဲ့ ကလေး မဖျက်ချပေးဘူး ”
” ကျွန်မလည်း ကလေး ဖျက်ချဖို့ ဆရာမကို မတောင်းဆိုပါဘူး ဆရာမရယ်။ ကျွန်မလည်း ဗုဒ္ဓဘာသာ တစ်ယောက်အနေနဲ့ကလေး ဖျက်ချရမှာ ကြောက်ပါတယ်။ ”
” အဲဒါဆို ကျွန်မ က ဘာလုပ်ပေးရမလဲ။ ”
” ပထမ တစ်ခုအနေနဲ့ ကျွန်မ ကလေးမှာ ကိုယ်ဝန်ရှိနေတဲ့ ကိစ္စကို ဆရာမ ဘယ်သူ့ကိုမှ မပြောပါနဲ့လို့တောင်းပန်ပါတယ်။ ”
“အို ဆရာဝန်တွေဟာ လူနာရဲ့အတွင်းရေးကို အပြင်မှာ လျှောက်မပြောဘူးလို့ ဘွဲ့ယူတုန်းက သစ္စာဆိုထားပြီးသားပါ။ တရားရုံးမှာ တောင် လိုအပ်မှ ဖွင့်ပြောတာပါ ”
” စိတ်ချရအောင် ပြောတာပါ ဆရာမရယ် ”
“အမ ကဘာလုပ်မယ် စိတ်ကူးထားလဲ ”
” ရန်ကုန်မှာ ဒီလိုမျိုး အဖေ မပေါ်တဲ့ ကလေးတွေကို မွေးပေးတဲ့ နေရာရှိတယ်တဲ့။ ကလေးမွေးတဲ့ အထိ တာဝန်ယူပေးတယ်တဲ့။ ကလေးကို ပြန်ခေါ်သွားလည်း ရတယ်။ မခေါ်ပဲ ထားခဲ့လည်း ရတယ်တဲ့ ဆရာမရဲ့ ” အမေကား အားတက်သရော ပြောနေသည်။
” ဟုတ်ရဲ့လား အမရဲ့ ” လှနုဝေ တစ်ယောက် အံသြစွာ ပြန်မေးလိုက်သည်။
” ကျွန်မက ဆရာမများ သိမလားလို့ လာမေးတာ ဆရာမ မသိဘူးလား ” ကလေးအမေကလည်း လှနုဝေ ကို အံသြ တကြီးပြန်ကြည့်နေသည်။
” ကျွန်မလည်း ရန်ကုန်မရောက်တာ ကြာပြီ အမရဲ့။ ကျွန်မ မသိဘူး” လှနုဝေ တစ်ယောက် မသိရိုး အမှန်ပါ။ ရန်ကုန်နှင့် အဆက်အသွယ်ပြတ်နေတာကြာပြီ။ မိဘများနှင့်သာ ဖုန်းအဆက်အသွယ်ရသည်။ ရန်ကုန်မြို့ကြီး ဘာတွေ ပြောင်းလဲနေသည်ကို မသိ။
“ဒါဆိုလည်း စုံစမ်းပေးပါ ဆရာမရယ်။ ဒီလိုမျိုး ရှိတယ်ဆိုရင် ကျွန် မ သမီးကို အဲဒီမှာ သွားထားပြီး ကလေးမွေးပြီးမှ ပြန်ခေါ်မလားလို့ပါ။ ကလေးကိုတော့ကျွန်မ နောက်တော့ ပြန်ခေါ်မှာပေါ့။ ဆရာမရယ် စုံစမ်းပေးပါ ” ကလေး အမေကား ရန်ကုန်သူ လှနုဝေကို အားကိုးတကြီး တောင်းဆိုနေသည်။
” ဟုတ်ကဲ့ပါ အမရယ် ကျွန်မ စုံစမ်းပြီး ပြန်ပြောပါမယ် ”
“ဆရာမ က ရန်ကုန်သူ ဆိုတော့ စုံစမ်းရတာ ပိုလွယ်တာပေါ့။ အားကိုးပါတယ်။ မြန်မြန်လေး စုံစမ်းပေးပါနော်။ ကျွန်မသမီးလေး ဗိုက်မထွက်ခင်လေး ပို့ချင်လို့ပါ” ကလေး အမေကား စိုးရိမ်ပူပန်စွာ ပြောနေသည်။
မိုက်မိုက်မဲမဲနှင့် ကလေး ဖျက် ချ ပေးပါလို့ မတောင်းဆိုသည်ကိုပဲ လှနုဝေ တစ်ယောက် ကျေးဇူးတင်နေမိသည်။ ကလေး ဖျက်ချ ပေးရန် တောင်းဆိုကြသော မိဘများကို လှနုဝေ တစ်ယောက် မြင်ဖူးတွေ့ဖူးပါသည်။ အမေကိုယ်တိုင် သမီးဗိုက်ထဲမှ ကလေးကို ဖျက်ချခဲ့လို့ သေဆုံးခဲ့သော အမျိုးသမီးငယ်ပေါင်း များစွာကိုလည်း လှနုဝေ တစ်ယောက် တွေ့ဖူးခဲ့သည်။ ထို အမေတွေ ကဲ့သို့မဟုတ်ပဲ ကလေး အတွက် အကောင်းဆုံး စဉ်းစားပေးသော ဒီလိုမျိုးအမေမျိုးကား တွေ့ခဲပေသည်။
လှနုဝေ တစ်ယောက် ရင်မောစွာ ကျန်ခဲ့သည်။ ကလေး အမေ ပြောစကားများကား မှန်ရဲ့လားမ သိ။ လှနုဝေ တစ်ယောက် မည်သူ့ကို မေးရမည်မှန်းလည်း မသိ။ နောက်ဆုံး စုံစမ်းလို့ မရရင်တောင် လှနုဝေ မိဘ အိမ်သို့ ပို့ထားကာ ကလေး မွေးခိုင်းမည်ဟု သာ စိတ်ထဲ ဆုံးဖြတ်ထားလိုက်သည်။
Author : Dr. အေးချမ်းမိုး
မူရင်းရေးသားသူများနှင့် ပို့စ်တင်သူများအား လေးစားစွာ Credit ပေးပါသည်။
Comments
Post a Comment