လိင်တူဆက်ဆံခြင်း

လိင်တူဆက်ဆံသူများ၌ လိင်ပိုင်းဆိုင်ရာပြဿနာများရှိကြောင်း တွေ့ရသည်။ အမျိုးသားအချင်းချင်းဆက်ဆံခြင်း သို့မဟုတ် အမျိုးသမီးများ အချင်းချင်း ဆက်ဆံခြင်း၌ပင် အမျိုးမျိုးရှိနိုင်ပါသည်။ ဆေးပညာရှင်များ (ဆွေးနွေးပညာပေးသူများ) အနေဖြင့် ဤပြဿနာကို ကိုင်တွယ်ဖြေရှင်းရာ၌ လိင်ကွဲဆက်ဆံကြသူများ နည်းတူကူညီပေးရန် လိုအပ်မည်ဖြစ်၏။ လိင်တူဆက်ဆံခြင်းသည် HIVရောဂါ ကူးစက်နိုင်သည့် အခွင့်အလမ်းရှိနေသဖြင့် အန္တရာယ်ကင်းသော ဆက်ဆံမှုများ ဆောင်ရွက်စေရန် ပညာပေးခြင်းကဏ္ဍမှာ အထူးအရေးကြီးသည်။

လိင်တူဆက်ဆံသူများသည် လက်ရှိအခြေအနေပေါ်၌သာ အာရုံစူးစိုက်မှု ရှိနေကြ၏။ လိင်ကွဲဆက်ဆံသူများကဲ့သို့ လက်ထပ်ခြင်းနှင့် သား သမီးယူခြင်းတို့အထိ နောက်ပိုင်းအခြေအနေတို့ကို ထည့်သွင်းစဉ်းစားမှု မရှိကြပေ။ လိင်တူဆက်ဆံသူများကို ပညာပေးဆွေးနွေးရာတွင် လုံးဝဘက်လိုက်မှုမရှိစေရပါ။ အပြုအမူတစ်ခုကို လုပ်ဆောင်ရန် ဇွတ်အတင်းတိုက်တွန်းခြင်း မပြုသင့်ပါ။

လိင်တူဆက်ဆံသူများအား ပညာပေးဆွေးနွေးသောအခါ ဆွေးနွေးအကြံပေးမည့်သူသည် ကြိုတင်ကြံစည်တွေးတောထားခြင်း မပြုရန် အရေးကြီးပါသည်။ လိင်တူဆက်ဆံသူတိုင်းသည် စအိုဆက်ဆံခြင်းအမှုကို ပြုလုပ်ကြသည် မဟုတ်ပေ။ လိင်တူဆက်ဆံသူများတွင် အကြမ်းသဘောအားဖြင့်Activeဖြစ်သူနှင့် Passiveဖြစ်သူဟူ၍ နှစ်မျိုးတွေ့ရမည်ဖြစ်၏။ ထိုသို့ခွဲခြားထားမှုရှိသော်လည်း တစ်ဦးနှင့်တစ်ဦးအပြန်အလှည် စအိုဆက်ဆံမှု ပြုတတ်လေ့ရှိ၏။ Passive ဖြစ်သူသည် အများအားဖြင့် ယောကျ်ားပီသမှုနည်း၍ တက်ကြွမှုမရှိကြောင်း တွေ့ရ၏။ အမျိုးသမီးအချင်းချင်း လိင်ဆက်ဆံရာတွင် တစ်ဦးသည် စိတ်ပိုင်းဆိုင်ရာအရ ပိုမို Active တက်ကြွမှုရှိကြောင်း တွေ့နိူင်သည်။

ထိုသူတို့၏ အပြုအမူ၊ စိတ်နေသဘောထား၊ တွေးခေါ်စဉ်းစားမှု၊ စိတ်ခံစားမှု စသည်တို့ကို သူတို့သာလှျှင် အသိနိူင်ဆုံးဖြစ်သည်။ ထိုအချက်ကိုပင် ဆွေးနွေးအကြံပေးသူများ နားလည်သဘောပေါက်ရန် လိုအပ်ပါသည်။ လိင်တူဆက်ဆံသူတို့အား အကြံပေးသူတို့ကိုယ်တိုင် နားမလည်နိူင်သော ကိစ္စများကို ဝင်ရောက်စွက်ဖက်ခြင်း မပြုသင့်ပါ။ မိမိပေးသော အကြံအစည် လမ်းညွှန်မှုများသည် ထိုသူတို့အတွက် သင့်လျော်ချင်မှ သင့်လျော်ပါလိမ့်မည်။

လိင်ပိုင်းဆိုင်ရာ အပြုအမှုများ
လိင်တူဆက်ဆံကြသူများ၏ စိတ်နေသဘောထားနှင့် နေထိုင်မှုဘဝပုံစံကို ရှင်းလင်းပြတ်သားစွာ နားလည်နိူင်ရန် မလွယ်ကူပေ။ လိင်တူဆက်ဆံကြသူများ၏ နေထိုင်ပြုမူမှုသည် အမျိုးမျိုးကွဲပြားမှုများ ရှိနေကြသည်။
တချို့သော လိင်တူဆက်ဆံသူများသည် ဆက်ဆံဖော်တစ်ဦးတည်းသာ ထားတတ်ကြ၏။ အခြားမည်သူတစ်ဦးတစ်ယောက်နှင့်မျှ နောက်ထပ်ဆက်ဆံခြင်း မပြုကြပေ။ တချို့မှာ တစ်ဦးထက်မကသော ဆက်ဆံဖော်များထားတတ်ကြသည်။ လိင်ကွဲဆက်ဆံသူများတွင် ဆက်ဆံဖော်တစ်ဦးထက် ပိုထားပါက “ သစ္စာမဲ့ခြင်း ” (သစ္စာဖောက်ခြင်း) ဟု သတ်မှတ်သကဲ့သို့ လိင်တူဆက်ဆံသူများသည်လည်း ဆက်ဆံဖော်အား သစ္စာရှိတတ်ကြပါသည်။ ထိုသူတို့၌လည်း တစ်ဦးထက်ပိုသော ဆက်ဆံဖော်ထားသူများအား “ သစ္စာမဲ့သူ ”အဖြစ် သတ်မှတ်ပါသည်။

လိင်တူဆက်ဆံသူ အမျိုးသားများ
လူ့အသိုက်အဝန်းများက စအိုဆက်ဆံခြင်းကို မကောင်းမှုတစ်ခု၊ ရှောင်ကြဉ်ဖွယ်ရာ ကိစ္စတစ်ခုဟု သတ်မှတ်ခဲ့ကြ၏။ ရိုးရာယဉ်ကျေးမှုအရ တဘူး (Taboo) တစ်ခုဟုပင် ဆိုနိူင်ပါသည်။ လိင်ဆက်ဆံရာတွင် အပြုအမှု အမျိုးမျိုးတွေ့နိုင်သည်။ အပြန်အလှန် စိတ်ဖြေဖျောက်ပေးခြင်း ပါးစပ်ဖြင့် လိင်ကိစ္စပြုခြင်း စအိုဆက်ဆံခြင်းစသည်တို့ ပြုလုပ်တတ်ကြသည်။

လိင်တူဆက်ဆံသူ အမျိုးသမီးများ
အမျိုးသမီးများအကြား လိင်တူဆက်ဆံမှုနှင့် ပတ်သက်၍ သုတေသနပြုလုပ်ထားမှု အင်မတန်နည်းပါးလှပါသည်။ အမျိုးသမီးများ လိင်တူဆက်ဆံရာတွင် အများဆုံး အသုံးပြုသည့်နည်းမှာ အပြန်အလှန် စိတ်ဖြေဖျောက်ပေးခြင်းပင်ဖြစ်၏။ ပါးစပ်ဖြင့် လိင်ကိစ္စပြုခြင်းနှင့် ခန္ဓာကိုယ်အား ထိတွေ့ပွတ်သပ်ပေးခြင်းပင် ဖြစ်၏။ ပါးစပ်ဖြင့် လိင်ကိစ္စပြုခြင်းနှင့် ခန္ဓာကိုယ်အား ထိတွေ့ပွတ်သပ်ပေးခြင်း အပြုအမှုများလည်း ပြုလုပ်တတ်ကြ၏။ ပစ္စည်းကိရိယာများ အသုံးပြုခြင်းများလည်း ရှိကြသည်။

ဝေါဟာရအသုံးအနှုန်းများ
လိင်တူဆက်ဆံကြသူများအကြား အချင်းချင်းဆက်ဆံပြောဆိုရာတွင် သုံးနှုန်းသော ဝေဟာရများစွာရှိကြကြောင်း တွေ့ရသည်။ ဆေးပညာရှင်များနှင့် ဆွေးနွေးအကြံပေးမည့်သူများအဖို့ ယင်းဝေါဟာရများနှင့်လည်း ရင်းနှီးကျွမ်းဝင်မှုရှိရန် လိုအပ်ပါသည်။
Active နှင့် Passive ဟူသော ဝေါဟာရမှာ လိင်တူဆက်ဆံသူများအကြား သုံးလေ့မရှိပေ။ အပြင်လူတစ်ဦးအနေဖြင့်သာ လိင်တူဆက်ဆံသူနှစ်မျိုးရှိပြီး တချို့ Active ဖြစ်သူ၊ တချို့ Passive ဖြစ်သူစသည်ဖြင့် ခွဲခြားသုံးနှုန်းခြင်း ဖြစ်၏။ Active နှင့် Passive ဟူသော ဝေါဟာရကိုပင် ထိုသူများအား ဆွေးနွေးပညာပေးရာတွင် မသုံးမိအောင် သတိထားရမည့် ဖြစ်သည်။

ပြဿနာများ
လိင်တူဆက်ဆံသူများတွင် တွေ့ရတတ်သော ပြဿနာများမှာ-
– လိင်အင်္ဂါတောင့်တင်းမှု ပြဿနာ
– သုတ်မလွှတ်နိူင်ခြင်း
– စအိုကွဲနာ
– အမျိုးသမီးများတွင် ဆက်ဆံလမ်းကြောင်းကျုံ့ခြင်း။
– ဆန္ဒပြီးမြောက်မှုမရှိခြင်း။
– လိင်ဆန္ဒလျော့နည်းခြင်း။
– ရောဂါပိုးမွှားများ ကူးစက်ခံရခြင်း။ (ဥပမာ    – ဗိုင်းရပ်စ်ပိုး)
– အသည်းရောင်ရောဂါ
– အခြားလိင်ဆက်ဆံမှုကြောင့် ကူးစက်တတ်သောရောဂါများ
လိင်တူဆက်ဆံခြင်းအားဖြင့် ပညာပေးဆွေးနွေးခြင်း
ဆေးပညာရှင် သို့မဟုတ် နှစ်သိမ့်ဆွေးနွေးပညာပေးသူသည် အောက်ပာအချက်များကို လိုက်နာဆောင်ရွက်သင့်သည်။
– မိမိကိုယ်တိုင် ရိုးသားပွင့်လင်းမှုရှိပါ။
အကယ်၍ လိင်တူဆက်ဆံသူများနှင့် စကားပြောဆိုဆက်ဆံရန် မနှစ်မြို့ပါက အခြားဆေးပညာရှင် (သို့မဟုတ်) ဆွေးနွေးအကြံပေးပုဂ္ဂိုလ်ထံ လွှဲပြောင်းပေးပါ။ ဆိုလိုသည်မှာ စိတ်မကြည်လင်သော ကိစ္စကို မဆောင်ရွက်ပါနှင့်။
– အကယ်၍ လိင်တူဆက်ဆံသူသည် ဆယ်ကျော်အသက်ရွယ်များဖြစ်ပါက လိင်မှုကိစ္စ နားမလည်မှု၊ ရှုပ်ထွေးနေမှုများကို လမ်းညွှန်အကြံပေးပါ။ ဆုံးဖြတ်မှုပေးသင့်ပါက ဆုံးဖြတ်ပေးပါ။
– ကြိုတင် ထင်မြင်ယူဆချက်များ၊ ခန့်မှန်းမှုများ မထားရပါ။
– လိင်တူဆက်ဆံသူများအားလည်း ပြန်လှန်ပြောဆိုခွင့်များများ ပေးပါ။
– လိင်ဆက်ဆံမှုသည် အမြဲတမ်း တစ်သမတ်တည်း ရှိနေခြင်း မဟုတ်ပေ။
ပြောင်းလဲတတ်သော သဘောရှိသည်ကို နားလည်ထားရမည်ဖြစ်၏။

စအိုဆက်ဆံမှု (Anal Sex)
ဗြိတိန်နိုင်ငံတွင် လိင်ကွဲဆက်ဆံသူများ၏ သုံးပုံတစ်ပုံခန့်သည် စအိုဆက်ဆံမှုကို တစ်ခါတစ်ရံပြုလေ့ရှိကြောင်း တွေ့ရသည်။ လိင်တူဆက်ဆံသူများ၏ သုံးပုံနှစ်ပုံမှာ စအိုဆက်ဆံမှု ပြုကြ၏။ ထို့ကြောင့် စုစုပေါင်းအရေအတွက်ကို လေ့လာကြည့်လျှင် လိင်ကွဲဆက်ဆံသူ အမျိုးသားများ အရေအတွက်က စအိုဆက်ဆံမှုတွင် သာလွန်နေကြောင်း တွေ့ရမည်ဖြစ်၏။

စအို၏ ခန္ဓာဗေဒသဘော
စအိုအား မျိုးပွားအင်္ဂါများသို့သွားသော အာရုံကြောများကပင် အာရုံကြောငယ်များ ပေးပို့ထားခြင်းဖြစ်၏။ အပြင်ပိုင်းသည် ထိမှုနှင့်အပူအအေးကို ခံစားနိုင်ပြီး အတွင်းပိုင်းသည် ကျဉ်းမြောင်းခြင်း၊ ကျယ်ခြင်းအာရုံကို သိရှိနိုင်ကြောင်း တွေ့ရ၏။ စအိုရှိ ကြွက်သားများသည် စိတ်ဆန္ဒဖြင့် ကျုံညှစ်နိုင်ကြသည်။

လူနာများအား အကြံပေးခြင်း
– အမှန်တကယ် စအိုဆက်ဆံမှု လိုလားခြင်း ရှိမရှိ မေးမြန်းရပါမည်။ ဆက်ဆံဖော်၏
ဖိအားပေးမှုကြောင့် ဆက်ဆံရခြင်းမျိုး မဖြစ်သင့်ပါ။
– စအိုလမ်းကြောင်း ကြွက်သားများလျော့အောင် ပြုသင့်သည်။
– Condoms ကွန်ဒုံးအသုံးပြုခြင်းကို တိုက်တွန်းအားပေးပါ။
– စအိုလမ်းကြောင်းကျယ်အောင် ပြုလုပ်သည့်နည်းလမ်းကို ညွှန်ပြပေးပါ။

Author; Dr. အေးကျော်(ဇီဝကမ္မဗေဒ)

မူရင်းရေးသားသူများနှင့် ပို့စ်တင်သူများအား လေးစားစွာ Credit ပေးပါသည်။