ရာသီပွင့်ပန်း မနွမ်းစေချင်

၁။ ရက်ရှောင်ခြင်း နည်းစနစ်
ရာသီသွေးမပေါ်မီ ၇ရက်၊ ရာသီသွေးပေါ်ပြီး ၇ရက်အတွင်းမှာပဲ လိင်ဆက်ဆံတာ ဖြစ်ပါတယ်။ ရာသီသွေးပေါ်ပြီး ၇ရက်နောက်ပိုင်း ၈၊ ၉၊ ၁၀၊ ၁၁၊ ၁၂၊ ၁၃၊ ၁၄၊ ၁၅၊ ၁၆၊ ၁၇၊ ၁၈၊ ၁၉၊ ၂၀၊ ၂၁ ရက်တွေမှာ အကာအကွယ်မဲ့ လိင်ဆက်ဆံတာကို ရှောင်ကြဉ်တဲ့ နည်းလမ်းဖြစ်ပါတယ်။ အဲဒီရက်မှာ လိင်ဆက်ဆံမယ်ဆိုရင်လည်း ကွန်ဒုံးလို အကာအကွယ်ပစ္စည်း သုံးရပါမယ်။ ဒီလို ရက်ရှောင်တဲ့နည်းက လူတစ်ဦးချင်းစီအလိုက် အနည်းငယ် ကွာခြားမှုရှိနိုင်တဲ့အတွက် ၁၀၀ ရာခိုင်နှုန်းတော့ စိတ်မချရပါဘူး။ အထူးသဖြင့် ရာသီသွေးပေါ်ရက်များတဲ့ အမျိုးသမီးတွေ (ဥပမာ -သွေးပေါ်ရက် ၅ရက် ၇ရက် ရှိသူများ) အတွက်သွေးပေါ်ပြီး ၇ရက် သွေးမပေါ်ခင် ၇ရက်ဟာ ပုံသေတွက်ဖို့ ခက်တာမို့ ကလေးရသွားနိုင်ပါတယ်။

၂။ ကွန်ဒုံး (Condom) အသုံးပြုခြင်း
ကွန်ဒုံး အသုံးပြုတာဟာ စနစ်တကျ အသုံးပြုတတ်မယ်ဆိုရင် ကိုယ်ဝန်အပြင် ကာလသားရောဂါနဲ့ HIV ရောဂါပိုးသွေးအပါအဝင် လိင်ကတစ်ဆင့် ကူးစက်တတ်တဲ့ ရောဂါတွေကိုပါ မကူးစက်အောင် ကာကွယ်ပေးနိုင်ပါတယ်။ ကွန်ဒုံးကို  နှစ်ထပ်စွပ်တာမျိုး၊ လေမထုတ်ဘဲ စွပ်တာမျိုး မလုပ်ရပါဘူး။ အဲလိုလုပ်မိရင် ကွန်ဒုံးပေါက်ပြဲပြီး ကလေးရသွားနိုင်ပါတယ်။ နောက်ပြီး ကွန်ဒုံးကိုယောကျ်ားတန်ဆာလိင်တံမှာ စွပ်ရမှာပါ။ သရုပ်ပြထဲကဆို ငှက်ပျောသီးမှာ စွပ်ထား၊ လက်ညိုးမှာ စွပ်တာမျိုးလုပ်ပြီး လိင်ဆက်ဆံလို့မရပါဘူး။ မဟုတ်ရင် ကွန်ဒုံးကို ဆရာပြောသလို ငှက်ပျောသီးမှာ၊ လက်ညိုးမှာစွပ်ပြီး လုပ်တာပဲ။ ဒါပေမယ့် မထူးဘူး ကလေးရတာပဲ ဆိုတဲ့ လူမျိုးတွေလည်းရှိလို့
ဒီလိုပြောရတာပါ။

၃။ မိန်းမအင်္ဂါပြင်ပတွင် သုတ်လွှတ်ခြင်း
ယောကျ်ားရဲ့ လိင်ဆန္ဒအထွတ်အထိပ်ရောက်လို့ သုတ်လွှတ်ခါနီးပြီဆိုရင် မိန်းမကိုယ်ရဲ့ အပြင်ကို သုတ်လွှတ်တာမျိုးနဲ့လည်း ကိုယ်ဝန်မရအောင် ရှောင်ကြဉ်နိုင်ပါတယ်။ ဒါပေမယ့် စိတ်မချရပါဘူး။ လိင်တံအပြင်မထုတ်နိုင်ခင်မှာ သုတ်ရည်ထွက်သွားရင်ပဲဖြစ်ဖြစ်၊ အတွင်းထဲမှာ ရှိနေတဲ့အချိန် သုတ်ရည်အနည်းငယ် စီးဝင်သွားတာကြောင့်ပဲဖြစ်ဖြစ် မတော်တဆ ကိုယ်ဝန်ရသွားနိုင်ပါတယ်။

၄။ သားအိမ်ခေါင်းအစွပ် သုတ်ပိုးသတ်ဆေး
ဒါကတော့ လိင်မဆက်ဆံခင်မှာ ကိုယ့်သားအိမ်ခေါင်းနဲ့ တော်တဲ့ အစွပ်ကို မိန်းမကိုယ်ထဲထည့်ပြီး စနစ်တကျ စွပ်သုံးရတာပါ။ ဆီးလမ်းကြောင်း ပိုးဝင်နိုင်တဲ့ အခြေအနေများပါတယ်။ ကျွန်တော်တို့ မြန်မာနိုင်ငံမှာတော့ အသုံးနည်းပါတယ်။

၅။ ပဋိသန္ဓေတားသောက်ဆေး
(Oral Contraceptive pills)
ပဋိသန္ဓေတား  သောက်ဆေးမှာ အိစ်ထြိုဂျင်(Oestrogen)နဲ့ ပရိုဂျက်စတင်(Progestin) ဟော်မုန်းနှစ်မျိုးပါတဲ့ COC pill ( Combined Oral Contraceptive pills) နဲ့ ပရိုဂျက်စတင် တစ်မျိုးထဲပါတဲ့ တားဆေး Progestin only pills ဆိုပြီး နှစ်မျိုးရှိပါတယ်။ အဲဒီ တားဆေးတွေကို ရာသီသွေးပေါ်ပြီး ၂ရက် (ငါးရက်ခြောက်ရက်) ကစလို့ တစ်နေ့တစ်လုံး ပုံမှန်သောက်သွားမယ်ဆိုရင်ဆေးသောက်နေစဉ်ကာလအတွင်းမှာ လိင်ဆက်ဆံတာအတွက် ကလေးမရအောင် တားဆီးပေးပါတယ်။ ဆေးရပ်လိုက်မယ်ဆိုရင်လည်း ကလေးအလွယ်တကူ ပြန်ရစေပါတယ်။ ဒီလိုပြောလို့ ဆေးသောက်နေတုန်းက ဆက်ဆံခဲ့တာကြောင့် ဆေးသောက်ရပ်လိုက်တာနဲ့ ကလေးရမယ်လို့ ဆိုလိုတာ မဟုတ်ပါဘူး။ ဆေးသောက်ရပ်ပြီးချိန် လိင်ဆက်ဆံရင်သာ ကလေးရနိုင်တာ ဖြစ်ပါတယ်။
ဆေးသောက်စအချိန်မှာ ခေါင်းအုံ၊ ခေါင်းကိုက်တာမျိုး၊ သွေးဆင်းတာမျိုးတွေဖြစ်တတ်ပါတယ်။ စိုးရိမ်စရာမလိုပါဘူး။ ဆက်သောက်ရင် မှန်သွားပါလိမ့်မယ်။ အသက်အရွယ်မရွေး အသုံးပြုနိုင်ပါတယ်။ ကလေးမွေးထားတယ်ဆိုရင်တော့ မွေးပြီးလို့ တစ်လခွဲအကြာမှာ ဆေးသောက်နိုင်ပါတယ်။ တားဆေးက နေ့စဉ်မပြတ်သောက်ရတာမို့ မေ့ပြီး ဆေးမသောက်မိတာမျိုးဖြစ်တတ်ပါတယ်။ ဒါကြောင့် ဆေးသောက်မယ်ဆိုရင် သေချာသတိထားပြီးမှ မမေ့မလျော့သောက်သင့်ပါတယ်။

ဒီတားဆေးက ရေရှည်စွဲသုံးရင် သွေးတိုးရောဂါ၊ ဆီးချိုရောဂါ၊ နှလုံးသွေးကြောကျဉ်းရောဂါ၊ သွေးပြစ်ရောဂါ၊ သွေးပြန်ကြောထုံးရောဂါ၊ အသည်းရောဂါ၊ ရင်သားကင်ဆာရောဂါတွေကို ဖြစ်စေတတ်တာမို့ အဲဒီရောဂါအခံရှိတဲ့သူတွေမှာလည်း ဒီတားဆေး  မသောက်သုံးသင့်ပါဘူး။ အသက် ၃၅ နှစ်ကျော်ရင်လည်း ဟော်မုန်းနှစ်မျိုးပါတဲ့ တားဆေး မသောက်သင့်ပါဘူး။ သည်းခြေကျောက်တည်တဲ့သူတွေ၊ ခေါင်းတစ်ခြမ်းကိုက်ရောဂါ ရှိတဲ့သူတွေမှာလည်း ဒီတားဆေးကို မသောက်သင့်ပါဘူး။

၆။ ပဋိသန္ဓေတားထိုးဆေး
ထိုးဆေးမှာ ၁လခံ၊ ၂လခံ၊ ၃လခံ ထိုးဆေးတွေ ရှိပါတယ်။ မြန်မာနိုင်ငံမှာ အများဆုံးသုံးကြတာက ၃လခံ (Depo, Medroxyprogesterone acetate 150mg) ဖြစ်ပါတယ်။ အဲ့ဆေး တစ်ခါထိုးထားရင် ၃လအထိကလေးမရအောင် ထိထိရောက်ရောက် ကာကွယ်ပေးနိုင်တဲ့ဆေး ဖြစ်ပါတယ်။ ၃လတစ်ခါပုံမှန်ထိုးပေးရပါမယ်။ အလွန်ဆုံး ၁လ နောက်ကျလို့ရပါတယ်။ ဆေးထိုးပြီးရင် သွေးဆင်းနည်းတာ၊
မမှန်တာ၊ သွေးမပေါ်တော့တာမျိုး ဖြစ်တတ်ပါတယ်။ ဆေးကြောင့် ခေါင်းကိုက်တာ၊ ကိုယ်အလေးချိန်တိုးလာတာမျိုးလည်း ဖြစ်ပါတယ်။ ကလေးမွေးပြီးတဲ့ မိခင်တွေမှာလည်း မွေးပြီး ၁လခွဲ အကြာမှာ စထိုးနိုင်ပါတယ်။ ဆေးရပ်ပြီးရင် ကလေးချက်ချင်းလိုချင်လို့မရပါဘူး။ ကလေးရဖို့ လအနည်းငယ် စောင့်ရပါသေးတယ်။ အရွယ်မရွေး သုံးနိုင်ပါတယ်။ တချို့က ကိုယ်ဝန်ရှိနေတဲ့အချိန် ဒီပဋိသန္ဓေတား ထိုးဆေးထိုးလိုက်ရင် ကလေးပျက်ကြမယ် ထင်တတ်ကြပါတယ်။ အဲဒါ မှားပါတယ်။ ကိုယ်ဝန်ရှိနေရင်တောင်မှ ဒီဆေးထိုးလို့ ကလေးမပျက်ပါဘူး။ဆေးက ကလေးရဲ့ ခန္ဓာကိုယ် ချို့ယွင်းတာလောက်ပဲ ဖြစ်မှာပါ။ အရင်တုန်းက ကိုယ်ဝန်မြဲအောင်ဆိုပြီး ကိုယ်ဝန်နုစဉ် ပထမသုံးလအတွင်းမှာ ထိုးလို့ရတယ်လို့တောင်ပြောကြပါသေးတယ်။ ဒါပေမယ့် ဒီဆေးကြောင့် ကိုယ်ဝန်မပျက်ပေမယ့် ကိုယ်ဝန်မြဲစေတယ်ဆိုတာ ခိုင်ခိုင်မာမာသက်သေမရှိတာကြောင့် ဆက်မထိုးကြတော့တာပါ။ ဒါကိုမှ ကိုယ်ဝန်ရှိတုန်း
ဒီဆေးဆက်ထိုးချင်သပဆိုရင် ထိုးကြ၊ ကလေးကတော့ ပျက်မှာ မဟုတ်ဘူးနော်။

၇။ အရေးပေါ် ပဋိသန္ဓေတားသောက်ဆေး
အရေးပေါ် ပဋိသန္ဓေတားသောက်ဆေး(Emergency Contraceptive Pill)ကိုတော့ အကာအကွယ်လည်းမသုံးမိ၊ တားဆေးလည်းမထိုး၊ မသောက်ထားမိတဲ့ မျိုးဥကြွေချိန်အတွင်းမှာ လိင်ဆက်ဆံမိခဲ့ရင် ကိုယ်ဝန်မရအောင် အရေးပေါ်သုံးရတဲ့ ဟော်မုန်းဆေး အပြင်းစားတစ်ခု ဖြစ်ပါတယ်။ လိင်ဆက်ဆံပြီး ၇၂ နာရီ အတွင်းမှာ ပထမတစ်လုံးကို သောက်ရတာဖြစ်ပြီး အဲဒီ ပထမအလုံးသောက်ပြီး ၁၂ နာရီ အကြာမှာ နောက်တစ်လုံး ထပ်သောက်ရတာ ဖြစ်ပါတယ်။ စိတ်မကောင်းစရာတစ်ခုက အခုခေတ်လူငယ်တွေကြားမှာ ဒီ Contraceptive pills ကို သုံးချင်သလို သုံးနေကြတာတွေကို ကြားသိရတာပါပဲ။ ဒီလို အရေးပေါ်မှ သုံးရမယ့်ဆေးကို ဆိုင်တွေက အလွယ်တကူဝယ်ပြီးတော့ လိင်ဆက်ဆံပြီးတဲ့ အချိန်တိုင်းမှာ တိုက်နေ၊ သောက်နေကြတာကိုလည်း ကြားနေ၊ တွေ့နေရပါတယ်။ ဒီအရေးပေါ်ဆေးကို အဲ့လိုသောက်ရင် အဲ့မိန်းကလေးမှာ ဟော်မုန်းဆိုင်ရာ အပြောင်းအလဲတွေ ကြီးကြီးမားမားဖြစ်ပြီး ဒုက္ခရောက်သွားတတ်ပါတယ်။ ဒီဆေးဟာ ပုံမှန်တားဆေးမှာပါတဲ့ ဟော်မုန်းတွေကိုပဲ ပြင်းအားမြှင့်ထားတာ ဖြစ်ပါတယ်။ တစ်လကို တစ်ကြိမ်ထက် ပိုမသုံးသင့်ပါဘူး။ အရေးပေါ်တားဆေး ဆိုတဲ့အတိုင်း အရေးပေါ်အခြေအနေ မှသာ သုံးသင့်ပါတယ်။ ပုံမှန်တားဆေးထက် ဘေးထွက်ဆိုးကျိုး ပိုများပါတယ်။နောက်ပြီး ပိုအရေးကြီးတာက တစ်လထဲမှာ အဲဒီဆေးကို အများကြီးသုံးမိရင် ဟော်မုန်းဓာတ်တွေဖောက်ပြန်ပြီး ကလေးမရအောင် မတားနိုင်တော့ဘဲ ကိုယ်ဝန်ရှိသွားစေတတ်ပါတယ်။

၈။ လက်မောင်းအရေပြားအောက် ပစ္စည်းထည့်ခြင်း
ဒီနည်းစနစ်ကတော့ ဟော်မုန်းပါတဲ့အချောင်းလေး တစ်ချောင်းကနေ အထက်ကို မိန်းမရဲ့ လက်မောင်းအပေါ်ပိုင်း အရေပြားအောက်မှာ ထည့်သွင်းမြှုပ်နှံထားတဲ့ နည်းစနစ် ပါ။ အသက်အရွယ်မရွေး ထည့်လို့ရပါတယ်။ ကလေးမွေးပြီးတဲ့သူတွေမှာလည်း ကလေးမွေးပြီး တစ်လခွဲကစလို့ ထည့်သွင်းထားနိုင်ပါတယ်။ နေရာမှန်ရင် အနည်းဆုံး ၃ နှစ်ကနေ ၇ နှစ်အထိ ပဋိသန္ဓေမရအောင် တားဆီးပေးပါတယ်။ ကလေးပြန်လိုချင်ရင်လည်း အဲဒီမြှုပ်နှံထားတဲ့ အချောင်းလေးတွေကို ကျွမ်းကျင်သူနဲ့ အချိန်မရွေး ထုတ်ပစ်နိုင်ပြီး အချိန်စောင့်စရာမလိုဘဲ ကိုယ်ဝန်ချက်ချင်းရစေနိုင်ပါတယ်။ ဒီပစ္စည်းထည့်ခြင်းကြောင့် သွေးဆင်းများတာ၊ မအီမသာဖြစ်တာ၊ခေါင်းအုံ၊ ခေါင်းကိုက်တာတွေ၊ လိင်စိတ်နည်းတာတွေ ဖြစ်နိုင်ပေမယ့် အန္တရာယ်ဖြစ်အောင် မဖြစ်ပါဘူး။

၉။ သားအိမ်တွင်း ပစ္စည်းထည့်ခြင်း
သားအိမ်ထဲ ပစ္စည်းထည့်တဲ့နေရာမှာ သေးငယ်ပျော့ပျောင်းတဲ့ ကြေးနီနဲ့လုပ်ထားတဲ့ပစ္စည်းကို ထည့်ထားရတာပါ။  IUCD (Intrauterine Contraceptive Devices) ထည့်တယ်လို့ ခေါ်ကြတယ်။ ကလေးမွေးပြီးတဲ့အချိန် အပါအဝင် ကျွမ်းကျင်သူနဲ့ အချိန်မရွေးထည့်နိုင်ပါတယ်။ ထည့်တဲ့အချိန်မှာ နည်းနည်းနာတတ်ပေမယ့် ရေရှည်အတွက် အဆင်ပြေပါတယ်။ ကြေးနီ Copper T Cu 380A ဆိုရင် ၅နှစ်အထက်အထိ သုံးလို့ရပါတယ်။ ဒါပေမယ့် သူက သွေးဆင်းများတတ်ပါတယ်။ ရက်အကြာကြီးဆင်းတာမျိုးလည်း ဖြစ်တတ်ပါတယ်။ သွေးဆင်းများတာကြောင့်သွေးအားနည်းရောဂါလည်း ဖြစ်တတ်ပါတယ်။ ဟော်မုန်းထည့်ထားတဲ့ ပစ္စည်းကတော့သွေးဆင်းတာသိပ်မရှိလို့ သွေးအားနည်းတာ မဖြစ်နိုင်ပါဘူး။ ဒီပစ္စည်းထည့်ထားမယ်ဆိုရင် အခန့်မသင့်ရင် ထွက်ကျသွားတတ်တဲ့အတွက် သူ့ရဲ့ အမြီးဖြစ်တဲ့ ကြိုးကို စမ်းပေးဖို့တော့ လိုပါတယ်။ ကြိုးမစမ်းမိတော့ရင် တတ်ကျွမ်းနားလည်သူနဲ့ ပြန်ပြသင့်ပါတယ်။
နောက်ထပ်ဆိုးကျိုးတစ်ခုက သန္ဓေနေရာမှားတည်တာမျိုး ဖြစ်တတ်တဲ့အတွက် ရာသီသွေးပုံမှန်ပေါ်ရာကနေ ထိမ်သွားပြီး ဗိုက်ကလည်း အောင့်အောင့်နေတယ်ဆိုရင် မပေါ့ဆဘဲဆေးရုံ၊ ဆေးခန်းကို ချက်ချင်းပြသပြီး စစ်ဆေးကြည့်သင့်ပါတယ်။ သန္ဓေနေရာမှားတည်တာဟုတ်၊မဟုတ် သိနိုင်တဲ့ အလွယ်ဆုံးနည်းကတော့
-ပစ္စည်းထည့်ထားလျက်နဲ့ (ကြိုးစလည်းမိတယ်) သွေးထိမ်နေပြီဆိုရင် ကိုယ်ဝန်ရှိ၊ မရှိ ဆီးစစ်ကြည့်ပါ။
-ဆီးမှာ နှစ်ကြောင်းပေါ်နေပြီဆိုရင် သားဖွားမီးယပ် (သို့) နီးစပ်ရာဆေးရုံသို့ အမြန်ဆုံး သွားရောက်စစ်ဆေးခံပါ။

ဗိုက်အောင့်တဲ့အထိ မစောင့်ပါနဲ့။ ဘာလို့လဲဆိုတော့ တချို့သန္ဓေနေရာမှားတည်တဲ့သူတွေက အဲဒီသန္ဓေဥကြီးလာလို့ သားဥပြွန်ကို ဖောက်ထွက်တဲ့အချိန်မှ အပြင်းအထန် ဗိုက်အောင့်တာမျိုး ရှိတတ်လို့ပါပဲ။ အဲဒီအချိန်မှဆိုရင် အရေးပေါ်အခြေအနေ ဖြစ်သွားပါပြီ။ ဒါကြောင့် သန္ဓေနေရာမှားတည်တယ်လို့ သံသယရှိရင် ဆီးစစ်ကြည့်ပြီး သက်ဆိုင်ရာဆေးရုံ၊ ဆေးခန်းမှာ သွားရောက်ပြသဖို့ မမေ့ကြပါနဲ့။ မပေါ့ဆကြပါနဲ့။ အသက်အန္တရာယ်ဖြစ်နိုင်တဲ့ အခြေအနေတစ်ခုပါ။ လိင်ကတစ်ဆင့် ကူးစက်တတ်တဲ့ ရောဂါရှိတဲ့သူတွေ၊ သားအိမ်အနေအထားမမှန်တဲ့သူတွေ၊ သားအိမ်ခေါင်းရောင်နေတဲ့သူမှာ ဒီ IUCD ကို မထည့်သင့်ပါဘူး။

၁၀။ သားကြောဖြတ်ခြင်း
သားကြောဖြတ်တယ်ဆိုတဲ့နေရာမှာ ယောကျ်ားရဲ့ သုတ်ပြွန်ကို ဖြတ်တာရှိသလို မိန်းမရဲ့ သားဥပြွန်ကို ဖြတ်တာလည်း ရှိပါတယ်။ ဒီလို သားကြောဖြတ်တာက ပြန်ပြင်ချင်လို့ ကလေးပြန်လိုချင်လို့ မရတော့တာမို့ မဖြတ်ခင်သေချာစဉ်းစားပြီးမှ လုပ်ဖို့လိုပါတယ်။ ဒိလိုသားကြောဖြတ်ဖို့အတွက် အသေးစားခွဲစိတ်မှုလေး လုပ်ရမှာပါ။ ခွဲပြီးစမှာ အနည်းငယ်နာတာ ၊ရောင်တာရှိတတ်ပါတယ်။ ရေရှည်အတွက် အန္တရာယ်မရှိသလို လိင်စိတ်နဲ့စွမ်းဆောင်ရည်ကို မထိခိုက်စေနိူင်ပါဘူး။ အမျိုးသမီးတွေမှာတော့ သားကြောဖြတ်ပြီး ၃လ အကြာအထိ တခြားသားဆက်ခြားနည်းစနစ်တစ်ခုခုကို သုံးသင့်ပါတယ်။ ၃လနောက်ပိုင်းမှာတော့ စိတ်ချရပါပြီ။ ဒါပေမယ့် ၁၀၀ ရာနှုန်းစိတ်ချရတာတော့ မဟုတ်ပါ။ သားဥပြွန်ကို ဖြတ်တောက်ပြီးလုံအောင် ပိတ်ချည်ထားတဲ့ကြိုးက မတော်တဆပြေသွားတာ၊ ပြုတ်ထွက်သွားတာမျိုးဆိုရင် ကလေးပြန်ရသွားနိူင်ပါသေးတယ်။

၁၁။ ကလေးအား နို့မပြတ်တိုက်ခြင်းနည်း
ကလေးက အသက် ၆လအောက်မှာပဲရှိသေးရင် နေ့ရောညပါ နို့မပြတ်အောင် တိုက်ကျွေးမယ်ဆိုရင်လည်း သားဥကြွေတာကို တားဆီးပေးနိူင်တဲ့အတွက် ကိုယ်ဝန်မရအောင် ကာကွယ်ပေးနိူင်ပါတယ်။ ဒါပေမယ့် ဒီနည်းစနစ်ဟာ အခန့်မသင့်ရင် ကိုယ်ဝန်ရသွားတတ်တာမို့ ကလေး၊ တစ်လခွဲပြည့်တာနဲ့ တခြား ပဋိသန္ဓေတားဆေး၊ ထိုးဆေးတော့ မသုံးသင့်ပါဘူး။သွေးပြန်ကြောပိတ်တယ်။ သွေးခဲဆို့တတ်ပါတယ်။

၁၂။ နောက်ဆုံးပေါ် ယောကျ်ားပဋိသန္ဓေတားဆေး
ဒီဆေးကတော့ ပေါ်တာမကြာသေးတဲ့အတွက် ကျနော်တို့မြန်မာနိူင်ငံမှာ မရသေးပါဘူး။ ဒီအသစ်တီထွင် ထုတ်လုပ်လိုက်တဲ့ ယောကျ်ားပဋိသန္ဓေတားဆေးမှာ ဟော်မုန်းပါဝင်မှုမရှိဘဲ ထိုးဆေးအနေနဲ့ရော၊ သောက်ဆေးအနေနဲ့ပါ အသုံးပြုနိူင်မှာဖြစ်ပါတယ်။ ထိုးဆေးကတော့ယောကျ်ားရဲ့သုတ်ပို့ပြွန်ထဲကို ထိုးရမှာဖြစ်ပြီး သုက်ပိုးတွေကို ရှေ့ဆက်မထွက်နိူင်ဘဲနောက်ပြန်သွားပြီး ပျက်စီးသွားအောင် ပြုလုပ်ပေးတဲ့အတွက် ကလေးမရနိူင်တော့ပါ။ တစ်ခါထိုးထားရင် နှစ်နဲ့ချီပြီးခံပါတယ်။ တချို့ဆေးတွေကတော့ သုတ်လွှတ်တာကို တားဆေးပေမယ့် ဆန္ဒပြီးမြောက်မှု (Orgasm) ရအောင်စီမံထားပေးပါတယ်။ သုက်ပိုးတွေကိုသာ ဟန့်တားပြီး ကျန်တဲ့အရည်အသွေးတွေကိုတော့ စီးထွက်ခွင့်ပြုမှာမို့ နာကျဉ်မှုကိုလည်း မခံစားရစေနိူင်ဘူးလို့လည်း ဆိုပါတယ်။ သောက်ဆေးဟာလည်း ဟော်မုန်းမပါဝင်တာမို့ ကျန်းမာရေးဆိုးကျိုး မရှိနိူင်ဘူးလို့ ဆိုပါတယ်။
ဒီဆေးတွေကို ကမ္ဘာ့ယောကျ်ားလူဦးရေရဲ့ တစ်ဝက်ကျော်လောက်ကအသုံးပြုကြလိမ့်မယ်လို့ ထုတ်လုပ်သူတွေက မှျှော်မှန်းထားတယ်လို့ သိရပါတယ်။ ဒီဆေးကြောင့် အလွှာပါးပေမယ့် ကမ္ဘာ့ခြားသလိုခံစားနေရတဲ့ ကွန်ဒုံးအသုံးပြုသူ ယောကျ်ားလေးအတွက်လည်း အဆင်ပြေပါလိမ့်မယ်။ ဒါပေမယ့် ကူးစက်ရောဂါတွေကို ကာကွယ်နိူင်ဖို့တော့ ကွန်ဒုံးဆက်ရှိနေဦးမှာပါ။ အမျိုးသမီးတွေအနေနဲ့လည်း သန္ဓေတား ဟော်မုန်းဆေးတွေ သောက်ရ၊ထိုးရလို့ ရောဂါအမျိုးမျိုးရတဲ့ဘေးကနေ ကင်းဝေးစေမှာမို့ ဒီကျားသန္ဓေတားဆေးက ဝမ်းမြောက်ဖွယ်ရာ သတင်းကောင်း တစ်ခုဖြစ်မှာပါ။ ဒီလောက်ဆိုရင်ကို သားဆက်ခြားနည်း၊ ကိုယ်ဝန်တားနည်းတွေကို သဘောပေါက်လာပြီလို့ ယူဆပါတယ်။

နိဂုံးချုပ်အနေနဲ့ပြောရရင် ကျနော်တို့ မြန်မာအမျိုးသမီးတွေအနေနဲ့ ရိုးရာယဉ်ကျေးမှုအရ အရှက်တရားရှိရှိနဲ့ ကိုယ်ရဲ့အပျိုစင်ဘဝကို အိမ်ထောင်မကျခင်အထိ ထိန်းသိမ်းကြစေလိုပါတယ်။ အကြောင်းကြောင်းကြောင့် အပျိုစင်ဘဝကို မထိန်းသိမ်းနိူင်ဘူးဆိုရင်လည်း ကိုယ်ဝန်ဖျက်ချရတာမျိုး၊ အရှက်နဲ့ အသက်လဲရတာမျိုးမဖြစ်အောင် ကျနော်ပြောခဲ့တဲ့ ပဋိသန္ဓေတားနည်းလမ်းတွေထဲက ကိုယ်နဲ့အဆင်ပြေမယ့် နည်းလမ်းကို အသုံးပြုပြီး ကိုယ်ဝန်မရအောင်တားဆီးကာကွယ်သင့်ပါကြောင်း၊ ကိုယ်ဝန်ရမှ ဖျက်ချတာမျိုး မလုပ်ကြစေလိုကြောင်း ပြောကြားရင်း ကျနော့်ရဲ့ ရာသီပွင့်လန်း မနွမ်းစေချင် ဆိုတဲ့ဆောင်းပါးကို နိဂုံးချုပ်လိုက်ပါရစေဗျာ။

Author: ဒေါက်တာနေလင်းအောင် (ပျော်ဘွယ်)

မူရင်းရေးသားသူများနှင့် ပို့စ်တင်သူများအား လေးစားစွာ Credit ပေးပါသည်။